Nêçîrvan Barzanî: Enfal hewlek ji bo tunekirina gelekî aştîxwaz bû

Welat TV - Hewlêr

Serokê Herêma Kurdistanê Nêçîrvan Barzanî peyamek bi bûneya 38emîn salvegera Enfala sala 1988an belav kir û got, Ew tawanên hovane ku rejîma berê ya Îraqê pêk anîbûn, zêdetirê 182 hezar zarok, jin, mêr û ciwanên bêguneh ên Kurdistanê tê de bûne qurbanî.

Nêçîrvan Barzanî tekez kir ku Enfal ne tenê tawanek bû, lê hewlek bû ji bo tunekirina tevahiya gelekî aştîxwaz.

Naveroka peyamê

Îro 38emîn salvegera bi êş a êrîşên reş ên Enfala sala 1988 dikin. Ew tawanên hovane ku rejîma berê ya Iraqê pêk anîbûn, zêdetirê 182 hezar zarok, jin, mêr û ciwanên bêguneh ên Kurdistanê tê de bûne qurbanî. Enfal ne tenê tawanek bû, lê belê hewleke bêber bû ji bo tunekirina tevahiya gelekî aştîxwaz ku birînên wê hê jî di laşê niştiman de mane.

Di vê bîranînê de, em serê rêz û hurmetê li ber canê pak ê şehîdan ditewînin û silavên dilsoziyê ji bo malbat û kesûkarên wan ên berxwedêr re dişînin. Li gor biryara Dadgeha Bilind a Tawanan a Iraqê, em tekez dikin ku berpirsiyariya Hikûmeta Federal a Iraqê ye ku qerebûya madî û manewî ji kesûkarên qurbaniyan re bike.

Li ser asta navdewletî, em ê di hewlên xwe de berdewam bin ji bo ku Enfal wek jenosîd were naskirin. Wek erka mirovî û niştimanî, em ê di pêvajoya lêgerîn û vegerandina termên pak ên şehîdan ji bo hembêza welêt de kêmasiyê nekin û her çi di destê me de be, divê xizmeteke zêdetir ji kesûkarên Enfalkiriyan re bê kirin.

Di vê bîranînê de, tekez dikin ku parastina kiyana destûrî ya Herêma Kurdistanê û destkeftiyên me, tenê bi lihevkirin û karê hevbeş ê hemû aliyên siyasî û pêkhateyan dibe. Ev mezintirîn wefa ye ji bo xwîna şehîdan û garantiya paşerojeke baştir e ji bo nifşên me ku em bi hêvî ve lê dinêrin.

Silav û rêz ji bo canê pak ê şehîdên Enfalê û hemû şehîdên Kurdistanê re.

Nêçîrvan Barzanî

Serokê Herêma Kurdistanê

14.04.2026